საჯარო სერვისების სიმწიფის სისტემა (PSMS) წარმოადგენს საჯარო სერვისების სრულყოფილების ახალ და ინოვაციურ ინსტრუმენტს, რომელიც სამოქალაქო საზოგადოებას შესაძლებლობას აძლევს შეაფასოს საჯარო სერვისები, დაადგინოს მათი სიმწიფის დონე და ამით ხელი შეუწყოს საჯარო დაწესებულებების ანგარიშვალდებულების გაზრდას.

აღსანიშნავია, რომ დღეს საჯარო სერვისების შემუშავებისა და მართვის პრაქტიკა ჯერ კიდევ საკმაოდ ქაოტურია, რაც თავის მხრივ მნიშვნელოვან გავლენას ახდენს მათ ხელმისაწვდომობასა და მიწოდების ხარისხზე. სერვისის მიმწოდებელ სახელმწიფო დაწესებულებებში არსებული მიდგომა და პრაქტიკა არ მიყვება საჯარო სერვისის სრულ სასიცოცხლო ციკლს და ხშირ შემთხვევაში გამოტოვებულია ისეთი მნიშვნელოვანი კომპონენტები როგორიცაა მოქალაქეთა ჩართულობა სერვისის ინიცირების პროცესში, მონაცემთა დამუშავება და ანალიზი, ა.შ. საჯარო სერვისების სიმწიფის სისტემა (PSMS), აღიარებულ, კარგ პრაქტიკაზე დაყრდნობით უზრუნველყოფს სისტემური მიდგომით საჯარო სერვისის სრული სასიცოცხლო ციკლისა და შესაბამისად მისი განვითარების ფაზების შეფასებას. აღნიშნული თავის მხრივ, შემფასებელ ორგანიზაციას/ინდივიდს შესაძლებლობას მისცემს გამოავლინოს ქაოტური პრაქტიკის შედეგად არსებული გამოწვევები და განსაზღვროს სერვისის სრულყოფილი მართვის უზრუნველსაყოფად გასაუმჯობესებელი მიმართულებები.

სისტემის მიხედვით საჯარო სერვისებს გააჩნიათ დიზაინისა და მიწოდების ეტაპები, ხოლო ეს ეტაპები თავის თავში მოიცავენ სერვისების განვითარების ფაზებს. თითოეული ეტაპი შედგება სამი ფაზისგან და ქმნის საჯარო სერვისების განვითარების სასიცოცხლო ციკლს. დიზაინის ეტაპი მოიცავს ინიცირების, ანალიზის და განხორციელების ფაზებს, ხოლო მიწოდების ეტაპი ტესტირების, დანერგვის და მუდმივი გაუმჯობესების ფაზებს აერთიანებს.

ამასთან, თითოეული ფაზა დაყოფილია პრინციპებად, რაც ჯამში 18 პრინციპს ქმნის. საჯარო სერვისების სიმწიფის სისტემა სერვისის თითოეულ ფაზას სამი პერსპექტივიდან აფასებს - შიდა, გარე და მომხმარებლის პერსპექტივა.

აღსანიშნავია, რომ PSMS-ის გამოყენებით შესაძლებელია ქვეყნის მასშტაბით საჯარო სერვისებისა და სერვისის მიმწოდებელი საჯარო დაწესებულებების რანგირების სისტემის შექმნა.